...ਤੇ ਫ਼ਿਰ ਰੌਸ਼ਨ ਪ੍ਰਿੰਸ ਨੇ ਬਦਲ ਦਿੱਤੇ ਗੀਤ ਦੇ ਬੋਲ

 ਨਖ਼ਰੋ ਦੀ ਅੱਖ ਲੜ ਗਈ ਆ ਟੈਮ ਤੇ... ਆਨਲਾਈਨ ਰਹਿੰਦੀ ਕੁੜੀ ਵੈੱਬਕੈਮ ਤੇ... 

ਨੱਖ਼ਰੋ ਨੇ ਕਾਲਜਾਂ ਦੇ ਮੁੰਡੇ ਪੱਟ ਤੇ, ਲਾਲਿਆਂ ਦੀ ਕੁੜੀ ਸੈਂਟੀ ਹੋ ਗਈ ਜੱਟ ਤੇ... 

ਦਸੰਬਰ 2011 ਦੇ ਆਖ਼ਰੀ ਹਫ਼ਤੇ ਰੌਸ਼ਨ ਪ੍ਰਿੰਸ ਦਾ ਇਹ ਗੀਤ ਬੜੇ ਜੋਰ-ਸ਼ੋਰ ਨਾਲ ਰਿਲੀਜ਼ ਹੋਇਆ ਅਤੇ ਬੜੇ ਧੱੜਲੇ ਨਾਲ ਇਸ ਦਾ ਪ੍ਰਚਾਰ ਕੀਤਾ ਗਿਆ। ਪ੍ਰਚਾਰ ਸ਼ੁਰੂ ਹੁੰਦੇ ਹੀ ਗੀਤ ਦਾ ਚਰਚਾ ਵੀ ਹੋਣ ਲੱਗ ਪਿਆ। ਹੁਣ ਗੀਤ ਦਾ ਚਰਚਾ ਐਨਾ ਹੋ ਰਿਹਾ ਹੈ ਤਾਂ ਇਕ ਵਾਰ ਫੇਰ ਪੜ੍ਹੋ...

ਨਖ਼ਰੋ ਦੀ ਅੱਖ ਲੜ ਗਈ ਆ ਟੈਮ ਤੇ... ਆਨਲਾਈਨ ਰਹਿੰਦੀ ਕੁੜੀ ਵੈੱਬਕੈਮ ਤੇ... 

ਨੱਖ਼ਰੋ ਨੇ ਕਾਲਜਾਂ ਦੇ ਮੁੰਡੇ ਪੱਟ ਤੇ, ਲਾਲ ਪਰੀ ਜੇਹੀ ਸੈਂਟੀ ਹੋ ਗਈ ਜੱਟ ਤੇ... 

ਹੁਣ ਤੁਸੀ ਸੋਚ ਰਹੇ ਹੋਵੋਗੇ ਕਿ ਬਾਰ-ਬਾਰ ਗੀਤ ਲਿਖਣ ਦਾ ਮਤਲਬ ਕੀ ਹੋਇਆ। ਜੇ ਧਿਆਨ ਨਾਲ ਪੜ੍ਹੋ ਤਾਂ ਉਪਰਲੀਆਂ 'ਤੇ ਹੇਠਲੀਆਂ ਸਤਰਾਂ ਵਿਚ ਫ਼ਰਕ ਤੁਹਾਨੂੰ ਆਪ ਦਿਖ ਜਾਵੇਗਾ। ਅਸੀ ਦੱਸਣਾ ਇਹ ਚਾਹੁੰਦੇ ਉਪਰਲੇ ਗੀਤ ਦੀ ਆਖ਼ਰੀ ਸਤਰ ਨਾਲ ਸੰਬੰਧਤ ਬਿਰਾਦਰੀ ਦੇ ਵਿਰੋਧ ਤੋਂ ਬਾਅਦ ਰੌਸ਼ਨ ਪ੍ਰਿੰਸ ਨੇ ਆਪਣੇ ਇਸ ਨਵੇਂ ਗੀਤ ਦੇ ਬੋਲ ਬਦਲ ਦਿੱਤੇ ਹਨ ਅਤੇ ਫਟਾਫਟ ਨਵੇਂ ਗੀਤ ਦਾ ਪ੍ਰਚਾਰ ਸ਼ੁਰੂ ਕਰ ਦਿੱਤਾ ਹੈ। ਸੂਤਰ ਦੱਸਦੇ ਹਨ ਕਿ ਗੀਤ ਦੇ ਬੋਲ ਸੁਣ ਕਿ ਸੰਬੰਧਤ ਬਿਰਾਦਰੀ ਨੇ ਇਸ ਗੀਤ ਸੰਬੰਧੀ ਰੋਸ ਪ੍ਰਗਟਾਇਆ ਸੀ, ਜਿਸ ਤੋਂ ਬਾਅਦ ਤੁਰੰਤ ਇਸ ਗੀਤ ਦੀ ਇਤਰਾਜ਼ਯੋਗ ਸ਼ਬਦਾਵਲੀ ਨੂੰ ਬਦਲ ਦਿੱਤਾ ਗਿਆ। ਹੁਣ ਇਸ ਗੀਤ ਵਿਚ ਕੁੜੀ ਦੀ 'ਤਾਰੀਫ' ਕਿਸੇ ਇਕ ਬਿਰਾਦਰੀ ਦਾ ਨਾਂ ਲੈ ਕੇ ਨਹੀਂ, ਬਲਕਿ ਹਰਮਨਪਿਆਰੀ ਲਾਲ ਪਰੀ (ਸ਼ਰਾਬ) ਕਹਿ ਕੇ ਕੀਤੀ ਜਾ ਰਹੀ ਹੈ। ਸ਼ਾਇਦ ਇਸ ਗੀਤ ਤੇ ਹੁਣ ਕਿਸੇ ਨੂੰ ਕੋਈ ਇਤਰਾਜ਼ ਨਹੀਂ ਹੋਵੇਗਾ। ਗੀਤ ਨਾਲ ਸੰਬੰਧਿਤ ਗਾਇਕ ਨੇ ਰੋਸ ਨੂੰ ਧਿਆਨ ਵਿਚ ਰੱਖਦਿਆਂ ਤੁਰੰਤ ਗੀਤ ਵਿਚ 'ਸੁਧਾਰ' ਕਰ ਕੇ ਇਕ ਵੱਡਾ ਵਿਵਾਦ ਹੋਣ ਤੋਂ ਟਾਲ ਲਿਆ ਹੈ, ਜਿਸ ਨੂੰ ਇਕ ਸ਼ਲਾਘਾਯੋਗ ਕਦਮ ਹੀ ਕਿਹਾ ਜਾ ਸਕਦਾ ਹੈ।

ਜ਼ਿਕਰਯੋਗ ਹੈ ਕਿ ਪਿਛਲੇ ਕੁਝ ਸਮੇਂ ਤੋਂ ਗਾਇਕਾਂ ਨੂੰ ਪੰਜਾਬੀ ਗੀਤਾਂ ਵਿਚ ਹਲਕੀ ਸ਼ਬਦਾਵਲੀ ਦੀ ਵਰਤੋਂ ਦੇ ਵਿਰੁੱਧ ਆਮ ਲੋਕਾਂ ਦੇ ਤਿੱਖੇ ਵਿਰੋਧ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਕੁਝ ਹੀ ਦਿਨ ਪਹਿਲਾਂ ਗਾਇਕ ਦਿਲਜੀਤ ਦੇ ਘਰ ਦੇ ਬਾਹਰ ਔਰਤਾਂ ਨੇ ਧਰਨਾ ਲਾਇਆ ਅਤੇ ਫ਼ਿਰ ਟ੍ਰੈਫਿਕ ਨਿਯਮ ਤੋੜਨ ਲਈ ਉਕਸਾਉਂਣ ਵਾਲੇ ਜਿੱਮੀ ਸ਼ੇਰਗਿੱਲ ਦੀ ਧਰਤੀ ਫ਼ਿਲਮ ਦੇ ਗੀਤ 'ਗੱਡੀ ਮੋੜਾਂਗੇ' ਦੇ ਖ਼ਿਲਾਫ਼ ਪੰਜਾਬ ਤੇ ਹਰਿਆਣਾ ਹਾਈਕੋਰਟ ਵਿਚ ਜਨਹਿੱਤ ਪਟੀਸ਼ਨ ਦਾਇਰ ਹੋਣ ਦਾ ਮਾਮਲਾ ਸੁਰਖੀਆਂ ਵਿਚ ਆਇਆ। ਹੁਣ ਰੌਸ਼ਨ ਪ੍ਰਿੰਸ ਦੇ ਗੀਤ ਦਾ ਮਸਲਾ ਸਾਹਮਣੇ ਆਉਣ ਤੋਂ ਬਾਅਦ ਲੱਗ ਰਿਹਾ ਹੈ ਕਿ ਲੰਬੇ ਸਮੇਂ ਤੋਂ ਚੁੱਪਚਾਪ ਸਭ ਕੁਝ ਵੇਖ-ਸੁਣ ਰਹੇ ਪੰਜਾਬੀਆਂ ਦੇ ਅੰਦਰ ਰੋਹ ਭਰ ਚੁੱਕਾ ਹੈ ਅਤੇ ਹੁਣ ਬਾਹਰ ਆਉਣ ਲਈ ਉਬਾਲੇ ਮਾਰ ਰਿਹਾ ਹੈ। ਇਹ ਤਾਂ ਵਕਤ ਹੀ ਦੱਸੇਗਾ ਇਕ ਇਹ ਲੋਕ ਰੋਹ ਪੰਜਾਬੀ ਸੰਗੀਤ ਅਤੇ ਫ਼ਿਲਮ ਜਗਤ ਵਿਚ ਕੀ ਨਵਾਂ ਮੋੜ ਲਿਆਂਦਾ ਹੈ।

ਤੁਹਾਡਾ ਲੋਕਾਂ ਵਿਚ ਜਾਗੇ ਇਸ ਤਾਜ਼ਾ ਰੋਹ ਬਾਰੇ ਕੀ ਕਹਿਣਾ ਹੈ? ਹੇਠਾਂ ਆਪਣੀ ਟਿੱਪਣੀ ਜ਼ਰੂਰ ਦਿਓ

Read More

8:06 AM | 0 comments

ਆਖ਼ਿਰ ਗਾਇਕ ਦਿਲਜੀਤ ਬਣ ਹੀ ਗਿਆ ਨੰਬਰ ਵਨ...

 ਦਿਲਜੀਤ ਨੂੰ ਚਾਹੁੰਣ ਵਾਲਿਆਂ ਦੇ ਨਾਲ-ਨਾਲ ਇਹ ਖ਼ਬਰ ਪੜ੍ਹ ਕੇ ਦਿਲਜੀਤ ਨੂੰ ਨਾ-ਪਸੰਦ ਕਰਨ ਵਾਲੇ ਵੀ ਸ਼ਾਇਦ ਅਜੀਬ ਮਹਿਸੂਸ ਕਰਨ ਕਿ ਦਿਲਜੀਤ ਬਾਕੀ ਸਾਰੇ ਗਾਇਕਾਂ ਨੂੰ ਪਿੱਛੇ ਛੱਡ ਕੇ ਪਹਿਲੇ ਨੰਬਰ ਤੇ ਪਹੁੰਚ ਗਿਆ ਹੈ। ਜਨਾਬ ਜੇ ਤੁਸੀ ਸੋਚ ਰਹੇ ਹੋ ਕਿ ਪੰਜਾਬੀ ਗਾਇਕੀ ਵਿਚ ਪਹਿਲੇ ਨੰਬਰ ਤੇ ਪਹੁੰਚ ਗਿਆ ਹੈ ਤਾਂ ਤੁਸੀ ਬਿਲਕੁਲ ਗਲਤ ਸੋਚ ਰਹੇ ਹੋ, ਦਰਅਸਲ ਉਹ ਲੱਚਰ ਗਾਇਕੀ ਵਿਚ ਨੰਬਰ ਇੱਕ ਗਿਣਿਆ ਗਿਆ ਹੈ। ਅਜਿਹਾ ਅਸੀ ਨਹੀਂ ਕਹਿ ਰਹੇ, ਇਹ ਕਹਿਣਾ ਹੈ ਇਸ਼ਤਰੀ ਜਾਗ੍ਰਿਤੀ ਮੰਚ ਦਾ ਜਿਹਨਾਂ ਨੇ ਮੰਗਲਵਾਰ ਨੂੰ ਲੁਧਿਆਣੇ ਦੇ ਇਲਾਕੇ ਦੁੱਗਰੀ ਸਥਿਤ ਗਾਇਕ ਦਿਲਜੀਤ ਦੇ ਘਰ ਅੱਗੇ ਧਰਨਾ ਦਿੱਤਾ। ਸੈਂਕੜੇ ਦੀ ਗਿਣਤੀ ਵਿਚ ਸ਼ਹਿਰ ਦਾ ਮਾਰਚ ਕਰਦੀਆਂ ਹੋਈਆਂ ਔਰਤਾਂ ਦਿਲਜੀਤ ਦੇ ਘਰ ਪਹੁੰਚੀਆਂ ਜਿਨ੍ਹਾਂ ਦੇ ਹੱਥਾਂ ਵਿਚ ‘ਅਸ਼ਲੀਲ ਗਾਇਕ ਦਿਲਜੀਤ ਮੁਰਦਾਬਾਦ’ ਲਿਖੇ ਹੋਏ ਬੈਨਰ ਫੜੇ ਹੋਏ ਸਨ। ਪੂਰਾ ਦਿਨ ਚੱਲੇ ਧਰਨੇ ਦੌਰਾਨ ਔਰਤਾਂ ਅਤੇ ਉਨ੍ਹਾਂ ਦੇ ਸਹਿਯੋਗੀਆਂ ਨੇ ਆਪਣੀ ਮੁਹਿੰਮ ਬਾਰੇ ਵਿਸਤਾਰ ਨਾਲ ਚਰਚਾ ਕੀਤੀ। ਪੰਜਾਬੀ ਗਾਇਕਾਂ ਵਲੋ ਸਭਿਆਚਾਰ ਦਾ ਮਿਆਰ ਡੇਗ ਕੇ ਪੇਸ਼ ਕੀਤੀ ਜਾਂਦੀ ਲੱਚਰ ਗਾਇਕੀਂ ਵਿਰੁੱਧ ਆਪਣੀ ਮੁਿਹਮ ਦੀ ਸੁਰੂਆਤ ਕਰਦਿਆਂ ਦੀ ਅਗਵਾਈੌ ਹੇਠ ਇਕੱਠੀਆਂ ਹੋਈਆ ਔਰਤਾਂ ਵਲੋਂ ਲੱਚਰ ਗਾਇਕੀ ਦੇ ਨਵ ਉਭਰੇ ਝੰਡਾ ਬਰਦਾਰ ਦਿਲਜੀਤ ਦੇ ਘਰ ਮੂਹਰੇ ਰੋਹ ਭਰਪੂਰ ਧਰਨਾਂ ਦੇ ਕੇ ਲੱਚਰਤਾ ਨੂੰ ਵਧਾਉਣ ਵਿਚ ਹਿੱਸਾ ਪਾ ਰਹੇ ਗੀਤਕਾਰਾਂ ਤੇ ਗਾਇਕਾਂ ਨੂੰ ਸਭਿਆਚਾਰ ਮਿਆਰ ਡੇਗਣ ਵਿਰੁੱਧ ਜੋਰਦਾਰ ਚੇਤਾਵਨੀ ਦਿੱਤੀ।ਕੜਾਕੇ ਦੀ ਠੰਡ ਦੀ ਪਰਵਾਹ ਨਾਂ ਕਰਦਿਆਂ ਵੱਡੀ ਗਿਣਤੀ ਵਿਚ ਬੀਬੀਆਂ ਦੁੱਗਰੀ ‘ਚ ਰੋਸ ਮਾਰਚ ਕਰਦੀਆਂ ਗਾਇਕ ਦਿਲਜੀਤ ਦੇ ਘਰ ਅੱਗੇ ਪਹੁਚੀਆਂ। ਮੰਚ ਦੀ ਆਗੂ ਗੁਰਬਖਸ਼ ਕੌਰ ਸੰਘਾ ਨੇ ਦੱਸਿਆ ਕਿ ਉਨ੍ਹਾਂ ਦੀ ਟੀਮ ਵੱਲੋਂ ਪੰਜਾਬ ਦੇ ਪੰਜ ਸ਼ਹਿਰਾਂ ਪਟਿਆਲਾ, ਜਲੰਧਰ, ਸੰਗਰੂਰ, ਬਰਨਾਲਾ, ਨਵਾਂ-ਸ਼ਹਿਰ ਵਿਚ ਕਰਵਾਏ ਗਏ ਸਰਵੇਖਣ ਮੁਤਾਬਿਕ ਦਿਲਜੀਤ ਦਾ ਨਾਮ ਗਾਣਿਆਂ ਵਿਚ ਔਰਤਾਂ ਬਾਰੇ ਲੱਚਰ ਟਿੱਪਣੀਆਂ ਕਰਨ ਵਿਚ ਪਹਿਲੇ ਨੰਬਰ ਤੇ ਆਇਆ ਹੈ। ਇਸੇ ਲੜੀ ਵਿਚ ਦੂਜਾ ਨੰਬਰ ਗੀਤਾ ਜ਼ੈਲਦਾਰ ਅਤੇ ਤੀਸਰਾ ਨੰਬਰ ਗਿੱਪੀ ਗਰੇਵਾਲ ਦਾ ਰਿਹਾ ਹੈ। ਸੰਘਾ ਨੇ ਦੱਸਿਆ ਕਿ ਇਸ ਮੁਹਿੰਮ ਦਾ ਮਕਸਦ ਕਿਸੇ ਇਕ ਕਲਾਕਾਰ ਵਿਰੁੱਧ ਗੁੱਸਾ ਕੱਢਣਾ ਨਹੀਂ, ਬਲਕਿ ਪੰਜਾਬੀ ਗੀਤਾਂ ਵਿਚ ਆ ਕੁੜੀਆਂ ਬਾਰੇ ਕੀਤੀਆਂ ਜਾਂਦੀਆਂ ਟਿੱਪਣੀਆਂ ਦੇ ਖ਼ਿਲਾਫ਼ ਹੈ। ਸਰਵੇਖਣ ਦੇ ਆਧਾਰ ਤੇ ਇਹ ਮੁਹਿੰਮ ਸਿਲਸਿਲੇਵਾਰ ਵੱਖ-ਵੱਖ ਗਾਇਕਾਂ ਦੇ ਘਰਾਂ ਅੱਗੇ ਰੋਸ ਮੁਜਾਹਰੇ ਕਰੇਗੀ ਅਤੇ ਗਾਇਕਾਂ ਨੂੰ ਇਸ ਗੱਲ ਲਈ ਮਜਬੂਰ ਕਰੇਗੀ ਕਿ ਉਹ ਹੁਣ ਤੱਕ ਗਾਏ ਲੱਚਰ ਗੀਤਾਂ ਲਈ ਮਾਫ਼ੀ ਮੰਗਣ ਅਤੇ ਭਵਿੱਖ ਵਿਚ ਅਜਿਹੇ ਗੀਤ ਨਾ ਗਾਉਣ ਦੀ ਸੌਂਹ ਖਾਣ। ਬੁਲਾਰਿਆਂ ਨੇ ਇੱਕਠ ਵਿਚ ਬੋਲਦਿਆਂ ਕਿਹਾ ਕਿ ਸ਼ੋਹਰਤ ਅਤੇ ਪੈਸੇ ਭੁੱਖੇ ਗੀਤਕਾਰਾਂ ਤੇ ਗਾਇਕਾਂ ਦੀ ਬਦੌਲਤ ਸਾਡਾ ਸਮਾਜ ਨਿਘਾਰ ਵੱਲ ਵੱਧਦਾ ਜਾ ਰਿਹਾ ਹੈ, ਜਿਸਦਾ ਬੁਰਾ ਅਸਰ ਨੌਜਵਾਨ ਪ੍ਹੀੜੀ ਤੇ ਪੈ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਗੀਤਾਂ ਵਿਚ ਔਰਤ ਨੂੰ ਨੁਮਾਇਸ਼ ਦੀ ਵਸਤੂ ਦੇ ਰੂਪ ਵਿਚ ਪੇਸ਼ ਕੀਤਾ ਜਾ ਰਿਹਾ ਹੈ ਤੇ ਨੌਜਵਾਨਾਂ ਨੂੰ ਵੈਲੀਪੁਣੇ ਵਲ ਧਕੇਲਿਆਂ ਜਾ ਰਿਹਾ ਹੈ। ਜਿਸ ਕਰਕੇ ਸਮਾਜ ਵਿਚ ਔਰਤਾਂ ਵਿਰੁੱਧ ਜੁਰਮਾਂ ਵਿਚ ਬੜੀ ਹੀ ਤੇਜੀ ਨਾਲ ਵਾਧਾ ਹੋ ਰਿਹਾ ਹੈ। ਉਨ੍ਹਾਂ ਔਰਤਾਂ ਅਤੇ ਸਮਾਜ ਦੇ ਚੇਤਨ ਵਰਗ ਨੂੰ ਇਸ ਵਿਰੁੱਧ ਜ਼ੋਰਦਾਰ ਅਵਾਜ਼ ਬੁਲੰਦ ਕਰਨ ਦੀ ਅਪੀਲ ਕੀਤੀ। ਮੰਚ ਦੀ ਸੂਬਾਈ ਆਗੂ ਚਰਨਜੀਤ ਕੌਰ ਨੇ ਕਿਹਾ ਸਾਮਰਾਜ ਦੇ ਦਲਾਲ ਲੋਕ ਨਾ ਸਿਰਫ ਆਰਥਿਕ ਨੀਤੀਆਂ ਰਾਹੀਂ ਮਿਹਨਤਕਸ਼ ਲੋਕਾਂ ਤੇ ਹਮਲੇ ਕਰ ਰਹੇ ਹਨ ਸਗੋਂ ਲੋਕਾਂ ਦੀ ਮਾਨਸਿਕਤਾ ਨੂੰ ਖਪਤਵਾਦ, ਅਸ਼ਲੀਲਤਾ ਅਤੇ ਲੱਚਰਤਾ ਦੀ ਪੁੱਠ ਚਾੜਨ ਲਈ ਸਭਿਆਚਾਰ ਨੂੰ ਇਕ ਹਥਿਆਰ ਵਜੋਂ ਇਸਤੇਮਾਲ ਕਰ ਰਹੇ ਹਨ। ਜਿਸ ਨਾਲ ਸਮਾਜ ਦੀਆਂ ਉਸਾਰੂ ਕਦਰਾਂ ਕੀਮਤਾਂ ਨੂੰ ਭਾਰੀ ਢਾਅ ਲੱਗ ਰਹੀ ਹੈ। ਉਨ੍ਹਾਂ ਇਸ ਹਮਲੇ ਵਿਰੁੱਧ ਚੇਤਨ ਹੋ ਕੇ ਅਵਾਜ਼ ਬੁਲੰਦ ਕਰਨ ਦਾ ਸੱਦਾ ਦਿੱਤਾ। ਮੰਚਞ ਦੀ ਆਗੂ ਅਨੀਤਾ ਸੰਧੂ ਨੇ ਕਿਹਾ ਕਿ ਸਰਕਾਰ ਵਲੋਂ ਲੱਚਰਤਾ ਪਰੋਸਣ ਵਾਲੇ ਇਨ੍ਹਾਂ ਗਾਇਕਾਂ ਵਿਰੁੱਧ ਕੇਸ ਦਰਜ ਕੀਤੇ ਜਾਣੇ ਚਾਹੀਦੇ ਹਨ। ਉਨ੍ਹਾਂ ਪ੍ਰਾਈਵੇਟ ਬੱਸਾਂ ਵਿਚ ਮਨੋਰੰਜਣ ਦੇ ਨਾਂ ਹੇਠ ਸ਼ੋਰ ਤੇ ਲੱਚਰਤਾ ਫੈਲਾਉਣ ਵਾਲੇ ਗੀਤਾਂ ਉੱਤੇ ਰੋਕ ਲਾਉਣ ਦੀ ਮੰਗ ਕੀਤੀ। ਇਸ ਮੌਕੇ ਇਸਤਰੀ ਜਾਗ੍ਰਿਤੀ ਮੰਚ ਵਲੋਂ ਅਜਿਹੇ ਗਾਇਕਾਂ ਖਿਲਾਫ ਲੜੀਵਾਰ ਧਰਨੇ ਲਾਉਣ ਦਾ ਫੈਸਲਾ ਲਿਆਂ ਗਿਆ। ਦਿਲਜੀਤ ਦੇ ਮਾਫ਼ੀ ਨਾ ਮੰਗਣ ਤੱਕ ਮੰਚ ਨੇ ਇਸ ਧਰਨੇ ਨੂੰ ਅਣਮਿੱਥੇ ਸਮੇਂ ਤੱਕ ਜਾਰੀ ਰੱਖਣ ਦਾ ਐਲਾਨ ਕੀਤਾ ਸੀ, ਪਰ ਮੌਕੇ ਤੇ ਪਹੁੰਚੇ ਦਿਲਜੀਤ ਦੇ ਚਚੇਰੇ ਭਰਾ ਨੇ ਦਿਲਜੀਤ ਦਿਲਜੀਤ ਵਲੋਂ ਭਰੋਸਾ ਦਿਵਾਇਆ ਗਿਆ ਕਿ ਵਿਦੇਸ਼ ਵਿਚ ਚੱਲ ਰਹੀ ਫਿਲਮ ਦੀ ਸ਼ੁਟਿੰਗ ਖਤਮ ਹੋਣ ਉਪੰਰਤ ਉਹ ਆਪ ਇਸਤਰੀ ਜਾਗ੍ਰਤੀ ਮੰਚ ਨਾਲ ਸੰਪਰਕ ਕਰੇਗਾ ਤੇ ਜੋ ਵੀ ਫੈਸਲਾ ਹੋਵੇਗਾ ਉਸ ਨੂੰ ਪ੍ਰੈਸ-ਕਾਨਫਰੰਸ ਕਰਕੇ ਸਭ ਦੇ ਸਾਹਮਣੇ ਰੱਖਿਆ ਜਾਵੇਗਾ। ਇਸ ਭਰੋਸੇ ਤੋਂ ਬਾਅਦ ਞਇਸਤਰੀ ਮੰਚ ਵਲੋਂ ਸ਼ਾਮ ਨੂੰ ਇਹ ਧਰਨਾਂ ਸਮਾਪਤ ਕਰ ਦਿੱਤਾ ਤੇ ਨਾਲ ਹੀ ਚਿਤਾਵਨੀ ਦਿੱਤੀ ਕਿ ਜੇਕਰ ਦਿਲਜੀਤ ਞ12 ਜਨਵਰੀ ਤੱਕ ਮੰਚ ਨਾਲ ਸੰਪਰਕ ਨਹੀ ਬਣਾਏਗਾ ਤਾਂ ਧਰਨਿਆਂ ਦੀ ਲੜੀ ਮੁੜ ਸੁਰੂ ਕੀਤੀ ਜਾਵੇਗੀ। ਇਸ ਤੋਂ ਇਲਾਵਾ ਇਸ ਧਰਨੇ ਨੂੰ ਅਮਨਦੀਪ ਕੌਰ, ਸੁਖਞਿਵੰਦਰ ਕੌਰ ਤੇ ਸੁਰਿੰਦਰ ਕੌਰ ਨੇ ਵੀ ਸਬੋਧਿਨ ਕੀਤਾ। ਇਸ ਤੋਂ ਪਹਿਲਾਂ ਵੀ ਦਿਲਜੀਤ ਆਪਣੇ ਚਾਹੁੰਣ ਵਾਲਿਆਂ ਪ੍ਰਤਿ ਬੁਰੀ ਸ਼ਬਦਾਵਲੀ ਵਰਤਣ ਕਰਕੇ ਵਿਵਾਦਾਂ ਵਿਚ ਘਿਰ ਚੁੱਕਾ ਹੈ ਅਤੇ ਇਸ ਬਾਰੇ ਇੰਟਰਨੈੱਟ ਮਾਧਿਅਮ ਤੇ ਲੰਬੇ ਸਮੇਂ ਤੱਕ ਸ਼ਬਦੀ ਜੰਗ ਚਲਦੀ ਰਹੀ ਹੈ। ਇਸੇ ਵਿਵਾਦ ਦੌਰਾਨ ਉਸਦਾ ਗੀਤ ਪੰਦਰਾਂ ਸਾਲਾਂ ਤੋਂ ਘੱਟ ਕੁੜੀਏ ਵੀ ਚੈਨਲਾਂ ਤੇ ਰਿਲੀਜ਼ ਨਹੀਂ ਹੋ ਸਕਿਆ। ਹੁਣ ਦੇਖਣਾ ਇਹ ਹੋਵੇਗਾ ਕਿ ਆਉਣ ਵਾਲੀ 12 ਜਨਵਰੀ ਤੱਕ ਦਿਲਜੀਤ ਅਤੇ ਬਾਕੀ ਗਾਇਕ ਕਲਾਕਾਰ ਜਿਨ੍ਹਾਂ ਦੇ ਇਸ ਸਰਵੇਖਣ ਵਿਚ ਨਾਮ ਆਏ ਹਨ, ਉਹ ਇਸ ਮਸਲੇ ਦਾ ਹੱਲ ਕਰਨ ਲਈ ਆਪ ਕੀ ਪਹਿਲ ਕਦਮੀ ਕਰਦੇ ਹਨ। ਦੇਖਣ ਵਾਲੀ ਗੱਲ ਇਹ ਵੀ ਹੋਵੇਗੀ ਕਿ ਧਰਨਾ ਲਾਉਣ ਵਾਲੀ ਧਿਰ ਇਸ ਮੁਹਿੰਮ ਨੂੰ ਕਿੱਥੋਂ ਤੱਕ ਲਿਜਾਂਦੀ ਹੈ ਜਾਂ ਫ਼ਿਰ ਇਹ ਮੁਹਿੰਮ ਵੀ ਕਿਸੇ ਸਿਆਸੀ ਪੈਂਤੜੇ ਵਾਂਗ ਕੁਝ ਹੀ ਦਿਨਾਂ ਵਿਚ ਮੁੱਕ ਜਾਂਦੀ ਹੈ।

(ਜਸਟ ਪੰਜਾਬੀ ਬਿਊਰੋ ਦੇ ਨਾਲ ਲੁਧਿਆਣਾ ਤੋਂ ਪੱਤਰਕਾਰ ਕੁਲਦੀਪ ਲੋਹਟ)
ਫੋਟੋਆਂ-ਕੁਲਵੰਤ ਸਿੰਘ ਮਰੜ ਅਤੇ ਕੁਲਦੀਪ ਲੋਹਾਟ

Read More

12:29 AM | 0 comments

ਸਤਿੰਦਰ ਸਰਤਾਜ ਦੀ ਮਹਿਫ਼ਿਲ ਦਿੱਲੀ ਵਿਚ

ਦਿੱਲੀ ਵਾਲਿਓ ਵੱਡੇ ਦਿਨ ਨੂੰ ਖੁਸ਼ਆਮਦੀਦ ਕਹੋ, ਰੂਹ ਨੂੰ ਸਕੂਨ ਦੇਣ ਵਾਲੀ ਗਾਇਕੀ ਅਤੇ ਅਰਥ-ਭਰਪੂਰ ਸ਼ਾਇਰੀ ਦੇ ਨਾਲ, ਕਿਉਂ ਕਿ ਕ੍ਰਿਸਮਿਸ ਮਨਾਉਣ ਦਿੱਲੀ ਆ ਰਿਹਾ ਹੈ, ਸਤਿੰਦਰ ਸਰਤਾਜ। ਪੰਜਾਬੀ ਬਾਗ਼ ਕ੍ਰਿਸਮਿਸ ਤੋਂ ਇਕ ਦਿਨ ਪਹਿਲਾਂ 24 ਦਸੰਬਰ ਦੀ ਸ਼ਾਮ, ਸਰਤਾਜ ਦੀ ਮਹਿਫ਼ਿਲ ਕਰਵਾ ਰਿਹਾ ਹੈ।


ਮਹਿਫ਼ਲ ਦਾ ਮਜ਼ਾ ਲੈਣ ਲਈ ਸਾਧਾਰਣ ਟਿਕਟ ਲਈ 1000 ਅਤੇ ਖ਼ਾਸ ਟਿਕਟ ਲਈ 1500 ਰੁਪਏ ਖਰਚਣੇ ਪੈਣਗੇ, ਪਰ ਜੇ ਤੁਸੀ ਸਰਤਾਜ ਦੇ ਫੈਨ ਹੀ ਨਹੀਂ 10 ਟਨ ਦੇ ਏਅਰ ਕੰਡੀਸ਼ਨਰ ਹੋ ਤਾਂ ਇਹ ਸੌਦਾ ਮਹਿੰਗਾ ਨਹੀਂ ਹੈ। ਸਰਤਾਜ ਸ਼ਾਮ ਛੇ ਵਜੇ ਤੋਂ ਸ਼ੁਰੂ ਕਰ ਕੇ ਚਾਰ ਘੰਟੇ ਲਈ ਤੁਹਾਡੇ ਦਿਲੋ-ਦਿਮਾਗ ਤੇ ਛਾ ਜਾਣ ਦੀ ਪੂਰੀ ਤਿਆਰੀ ਵਿਚ ਹੈ। ਮਹਿਫ਼ਿਲ ਬਾਰੇ ਜਿਆਦਾ ਜਾਣਕਾਰੀ ਲਈ ਅਤੇ ਟਿਕਟਾਂ ਖਰੀਦਣ ਲਈ ਇੱਥੇ ਕਲਿੱਕ ਕਰੋ।

Read More

1:06 PM | 0 comments

ਬੀਬੀਸੀ ਦੇ ਚੋਟੀ ਦੇ 40 ਏਸ਼ੀਅਨ ਗੀਤਾਂ ਵਿਚ 26 ਗੀਤ ਪੰਜਾਬੀ

ਰਿਪੋਰਟ-ਦੀਪ ਜਗਦੀਪ ਸਿੰਘ

ਇਸ ਹਫ਼ਤੇ ਦੁਨੀਆਂ ਭਰ ਦੇ ਪੰਜਾਬੀ ਆਪਣੇ ਸੰਗੀਤ ਦੀ ਬੁਲੰਦੀ ਦਾ ਜਸ਼ਨ ਮਨਾ ਸਕਦੇ ਹਨ। ਇਕ ਵਾਰ ਫਿਰ ਪੰਜਾਬੀ ਸੰਗੀਤ ਬੀਬੀਸੀ ਦੇ ਚੋਟੀ ਦੇ 40 ਏਸ਼ੀਆਈ ਗੀਤਾਂ ਦੀ ਸੂਚੀ ਵਿਚ ਛਾਇਆ ਹੋਇਆ ਹੈ। ਚਾਲੀ ਵਿੱਚੋਂ ਛੱਬੀ ਗੀਤ ਪੰਜਾਬੀ ਹਨ ਅਤੇ ਪਹਿਲੇ ਚਾਰ ਪਾਇਦਾਨਾਂ ਵਿਚੋਂ ਤਿੰਨ ਤੇ ਪੰਜਾਬੀ ਗੀਤਾਂ ਦੀ ਝੰਡੀ ਹੈ। ਦੁਨੀਆਂ ਭਰ ਨੂੰ ਦੀਵਾਨਾ ਬਣਾਉਣ ਵਾਲਾ ਹਿੰਦੀ ਫ਼ਿਲਮੀ ਗੀਤ ਆਪਣੇ 13 ਗੀਤਾਂ ਨਾਲ ਇਸ ਸੂਚੀ ਵਿਚ ਪੰਜਾਬੀ ਸੰਗੀਤ ਨੂੰ ਟੱਕਰ ਦੇਣ ਦੀ ਕੋਸ਼ਿਸ਼ ਕਰ ਰਿਹਾ ਹੈ ਅਤੇ ਬਾਕੀ ਬਚਿਆ ਇਕ ਨੰਬਰ ਗੈਰ-ਭਾਰਤੀ ਸੰਗੀਤ (ਜੇਅ ਸੀਨ ਦੇ ਗੀਤ ਲਾਈਕ ਦਿੱਸ, ਲਾਈਕ ਦੈਟ) ਦੀ ਝੋਲੀ ਵਿਚ ਪਿਆ ਹੈ। ਪੰਜਾਬੀ ਬਾਏ ਨੇਚਰ (ਪੀਬੀਐਨ) ਵੱਲੋਂ ਸੰਗੀਤਬੱਧ ਗੁਲਰੇਜ਼ ਅਖ਼ਤਰ ਅਤੇ ਬਲਵਿੰਦਰ ਭੱਟੀ ਦਾ ਗਾਇਆ ਗੀਤ ਫਿੱਟੇ ਮੂੰਹ ਏਸ਼ੀਆ ਦੇ ਚਾਲੀ ਚੋਟੀ ਦੇ ਗੀਤਾਂ ਵਿਚੋਂ ਪਹਿਲੇ ਨੰਬਰ ਤੇ ਲਗਾਤਾਰ ਦੂਜੇ ਹਫ਼ਤੇ ਬਣਿਆ ਹੋਇਆ ਹੈ। ਨਵਾਂ ਆਇਆ ਨਿੰਦੀ ਕੌਰ ਦਾ ਗੀਤ 'ਟੂ ਸੀਟਰ" ਆਉਂਦੇ ਹੀ ਦੂਜੇ ਨੰਬਰ ਤੇ ਪਹੁੰਚ ਗਿਆ ਹੈ। ਚੌਥੇ ਨੰਬਰ ਤੇ ਆਪਣੀ ਰਿਲੀਜ਼ ਤੋਂ 16 ਹਫ਼ਤੇ ਬਾਅਦ ਦਿਲਜਿਤ ਦਾ ਗੀਤ ਲੱਕ 28 ਪਹੁੰਚਿਆ ਹੈ, ਇਸ ਹਫ਼ਤੇ ਇਹ ਦੋ ਪਾਏਦਾਨ ਹੋਰ ਉੱਪਰ ਚੜ੍ਹਿਆ ਹੈ, ਯਾਨਿ ਇਸ ਗੀਤ ਦਾ ਲੋਕਪ੍ਰਿਅਤਾ ਹਾਲੇ ਵੀ ਵੱਧ ਰਹੀ ਹੈ। ਰਵੀ ਬੱਲ, ਕੈਲਾਸ਼ ਖ਼ੇਰ ਅਤੇ ਸ਼ਾਜ਼ੀਆ ਮਨਜ਼ੂਰ ਦੌ ਤਿਕੜੀ ਵੱਲੋਂ ਗਾਇਆ ਗਿਆ ਗੀਤ 'ਸੋਹਣਿਆ ਯਾਦਾਂ' ਅੱਠਵੇਂ ਸਥਾਨ ਤੇ ਹੈ। ਜੱਸੀ ਸਿੱਧੂ ਦਾ ਗਾਣਾ ਤਿੰਨ ਪੌੜੀਆਂ ਹੇਠਾ ਆ ਕੇ 12ਵੇਂ ਪਾਏਦਾਨ ਤੇ ਪਹੁੰਚ ਗਿਆ ਹੈ। ਲਹਿੰਬਰ ਹੁਸੈਨਪੁਰੀ ਦਾ ਬਾਲੀਵੁੱਡ ਨਾਲ ਪਹਿਲਾ ਪੇਚਾ ਹੀ ਕਾਮਯਾਬ ਹੋ ਗਿਆ ਹੈ। ਤਨੂੰ ਵੈਡਸ ਮੰਨੂ ਫ਼ਿਲਮ ਦਾ ਗੀਤ 'ਸਾਡੀ ਗਲੀ' ਲਗਾਤਾਰ ਸੰਗੀਤ ਪ੍ਰੇਮੀਆਂ ਦੀ ਪਸੰਦ ਬਣਿਆ ਹੋਇਆ ਹੈ। ਇਹ ਗੀਤ ਤਿੰਨ ਪਾਏਦਾਨ ਉੱਪਰ ਚੜ੍ਹ ਕੇ 16 ਸਥਾਨ ਤੇ ਪੁੱਜ ਗਿਆ ਹੈ। ਭਾਵੇਂ ਕਿ ਇਹ ਬਾਲੀਵੁੱਡ ਦਾ ਫ਼ਿਲਮੀ ਗੀਤ ਹੈ, ਪਰ ਅਸੀ ਇਸ ਨੂੰ 26 ਪੰਜਾਬੀ ਗੀਤਾਂ ਵਿਚ ਸ਼ਾਮਿਲ ਕੀਤਾ ਹੈ, ਕਿਉਂ ਕਿ ਇਹ ਪੂਰਾ ਤਰ੍ਹਾਂ ਪੰਜਾਬੀ ਗੀਤ ਹੈ ਜੋ ਹਿੰਦੀ ਫ਼ਿਲਮ ਵਿਚ ਸ਼ਾਮਿਲ ਕੀਤਾ ਗਿਆ ਹੈ। ਗੈਰੀ ਸੰਧੂ ਦਾ ਮਿੱਠਾ ਮੁੱਹਬਤ ਭਰਿਆ ਗੀਤ 'ਛੱਡ ਕੇ ਨਾ ਜਾਈਂ' 22ਵੀਂ ਪੌੜੀ ਤੇ ਜਗ੍ਹਾ ਬਣਾਉਣ ਵਿਚ ਸਫ਼ਲ ਰਿਹਾ ਹੈ। ਸ਼ੈਰੀ ਮਾਨ ਦਾ ਬਹੁ-ਚਰਚਿਤ ਗੀਤ 'ਯਾਰ ਅਣਮੁੱਲੇ' ਆਪਣੀ ਰਿਲੀਜ਼ ਤੋਂ 25 ਹਫ਼ਤੇ ਬਾਅਦ ਭਾਵੇਂ ਲਗਾਤਾਰ ਹੇਠਾ ਜਾ ਰਿਹਾ ਹੈ, ਫਿਰ ਵੀ 11 ਪੌੜੀਆਂ ਹੇਠਾਂ ਆ ਕੇ ਇਹ 31ਵੇਂ ਪਾਏਦਾਨ ਤੇ ਡਟਿਆ ਹੋਇਆ ਹੈ। ਇਸ ਸੂਚੀ ਵਿਚ ਹੋਰਨਾਂ ਪੰਜਾਬੀ ਕਲਾਕਾਰਾਂ ਵਿਚ ਡੀ. ਜੇ. ਡਿੱਪਸ ਗੈਰੀ ਸੰਧੂ ਨਾਲ, ਜੇ. ਕੇ., ਲਿਲ ਅਮਿਤ ਨਾਲ ਕਾਕਾ ਭੈਣੀਏ ਵਾਲਾ, ਡੀ. ਜੇ. ਐੱਚ. ਗੀਤਾ ਜ਼ੈਲਦਾਰ ਨਾਲ, ਮਨੀ ਹਾਇਪੀ, ਜਸਪਿੰਦਰ ਨਰੂਲਾ ੳਤੇ ਨਿਰਮਲ ਸਿੱਧੂ ਨਾਲ, ਨਟੋਰਿਅਸ ਜੱਟ, ਡੀ. ਸਰਬ, ਭੁੱਪਸ ਸੱਗੂ ਮਿਸ ਪੂਜਾ ਨਾਲ, ਡੀ. ਜੇ. ਰੈਗਸ ਸੁਦੇਸ਼ ਕੁਮਾਰੀ ਅਤੇ ਮੀਤ ਮਲਕੀਤ ਨਾਲ, ਗੁੱਪਸ ਸੌਂਢ/ਮੈੱਟਸ ਐਨ ਟ੍ਰਿਕਸ, ਬਿਕਰਮ ਸਿੰਘ, ਫੌਜੀ, ਨਿੱਕੀ ਜੀ ਮਨਜੀਤ ਸੋਹੀ ਨਾਲ, ਡੀ. ਜੇ. ਹਾਰਵੇ ਨਿਰਮਲ ਸਿੱਧੂ ਨਾਲ ਸ਼ਾਮਿਲ ਹਨ। ਮੀਕਾ ਸਿੰਘ ਆਪਣੇ ਫ਼ਿਲਮੀ ਗੀਤ 'ਢਿੰਕਾ ਚਿੱਕਾ' ਨਾਲ ਵੀ ਇਸ ਸੂਚੀ ਵਿਚ ਆਪਣੀ ਥਾਂ ਬਣਾਈ ਬੇਠਾ ਹੈ। ਸੋ, ਮਿੱਤਰੋ ਸੁਣਦੇ ਰਹੋ ਚੰਗਾ ਸੰਗੀਤ ਅਤੇ ਅਸਲੀ ਸੀ.ਡੀਜ਼ ਖਰੀਦਣਾ ਨਾ ਭੁੱਲਣਾ। ਪੰਜਾਬੀ ਸੰਗੀਤ ਦੀ ਗੁੱਡੀ ਇਸੇ ਤਰ੍ਹਾਂ ਦੁਨੀਆਂ ਵਿਚ ਚੜ੍ਹੀ ਰਹੇ, ਇਸ ਲਈ ਪਾਇਰੇਸੀ ਨੂੰ ਖਤਮ ਕਰੋ। ਤੁਸੀ ਇਸ ਚੋਟੀ ਦੇ 40 ਗੀਤਾਂ ਵਾਲਾ ਸ਼ੋਅ ਬੀਬੀਸੀ ਰੇਡੀਓ ਦੇ ਏਸ਼ਿਆਨ ਨੈੱਟਵਰਕ ਤੇ ਹਰ ਸ਼ਨਿਵਾਰ 15:00 ਤੋਂ 18:00 ਵਜੇ ਤੱਕ ਮੇਜ਼ਬਾਨ ਬੌਬੀ ਫ੍ਰਿਕਸ਼ਨ ਨਾਲ ਸੁਣ ਸਕਦੇ ਹੋ।

Read More

11:42 PM | 0 comments

ਕਲੀਆਂ ਦਾ ਬਾਦਸ਼ਾਹ ਕੁਲਦੀਪ ਮਾਣਕ ਸਖਤ ਬਿਮਾਰ

ਪੰਜਾਬੀ ਲੋਕ ਸੰਗੀਤ ਦਾ ਥੰਮ ਅਤੇ ਕਲੀਆਂ ਦਾ ਬਾਦਸ਼ਾਹ ਕੁਲਦੀਪ ਮਾਣਕ ਸਖਤ ਬਿਮਾਰ ਹੋਣ ਕਾਰਣ ਲੁਧਿਆਣਾ ਦੇ ਦੀਪ ਨਰਸਿੰਗ ਹੋਮ, ਮਾਡਲ ਟਾਊਨ ਵਿਖੇ ਇਲਾਜ ਅਧੀਨ ਹੈ। ਕੁਝ ਸਮਾਂ ਪਹਿਲਾ ਉਨ੍ਹਾਂ ਦਾ ਇਕਲੌਤਾ ਜਵਾਨ ਪੁੱਤਰ ਯੁੱਧਵੀਰ ਮਾਣਕ ਅਚਨਚੇਤ ਗੰਭੀਰ ਬਿਮਾਰੀ ਦਾ ਸ਼ਿਕਾਰ ਹੋ ਗਿਆ ਸੀ, ਅਜੇ ਉਹ ਵੀ ਪੂਰੀ ਤਰ੍ਹਾਂ ਤੰਦਰੁਸਤ ਨਹੀਂ ਹੋਇਆ ਕਿ ਪਰਿਵਾਰ ਉਤੇ ਦੂਜੀ ਮੁਸੀਬਤ ਆਣ ਪਈ ਹੈ। ਕੁਲਦੀਪ ਮਾਣਕ ਦੀ ਜੀਵਨ ਸਾਥਣ ਸਰਬਜੀਤ ਕੌਰ ਅਨੁਸਾਰ ਸ੍ਰੀ ਮਾਣਕ ਲਗਭਗ ਇੱਕ ਮਹੀਨਾ ਪਹਿਲਾ ਹਿਚਕੀ ਨਾ ਹਟਣ ਦੇ ਰੋਗ ਤੋਂ ਪੀੜਤ ਸਨ ਅਤੇ ਅਚਾਨਕ ਉਨ੍ਹਾਂ ਨੂੰ ਖੂਨੀ ਟੱਟੀਆਂ ਲੱਗਣ ਨਾਲ ਉਨ੍ਹਾਂ ਦੀ ਹਾਲਤ ਗੰਭੀਰ ਹੋ ਗਈ। ਇਸੇ ਹਾਲਤ 'ਚ ਉਨ੍ਹਾਂ ਨੂੰ ਕੁਝ ਦਿਨ ਪਹਿਲਾ ਹਸਪਤਾਲ ਵਿੱਚ ਦਾਖਲ ਕਰਵਾਇਆ ਗਿਆ। ਉਨ੍ਹਾਂ ਦਾ ਇਲਾਜ ਕਰ ਰਹੇ ਡਾ· ਬਲਦੀਪ ਸਿੰਘ ਅਤੇ ਡਾ· ਦਿਨੇਸ਼ ਨੇ ਦੱਸਿਆ ਕਿ ਹਫਤਾ ਪਹਿਲਾਂ ਮਾਣਕ ਦੀ ਹਾਲਤ ਖਤਰੇ ਅਧੀਨ ਸੀ, ਪਰ ਹੁਣ ਉਹ ਦਵਾਈ ਨੂੰ ਸਹਾਰ ਰਹੇ ਹਨ ਅਤੇ ਉਮੀਦ ਕੀਤੀ ਜਾ ਸਕਦੀ ਹੈ ਕਿ ਲਗਭਗ ਹਫਤੇ ਬਾਅਦ ਉਹ ਕੁਝ ਤੰਦਰੁਸਤ ਹੋ ਕੇ ਆਪਣੇ ਘਰ ਜਾ ਸਕਣ।

ਕੁਲਦੀਪ ਮਾਣਕ, ਪਤਨੀ ਸਰਬਜੀਤ ਕੌਰ

ਕੁਲਦੀਪ ਮਾਣਕ ਦੀ ਧਰਮ ਪਤਨੀ ਸਰਬਜੀਤ ਕੌਰ ਨੇ ਮਾਣਕ ਦੇ ਦੇਸ਼ ਵਿਦੇਸ਼ ਵੱਸਦੇ ਸੁਭ ਚਿੰਤਕਾਂ ਨੂੰ ਅਪੀਲ ਕੀਤੀ ਕਿ ਉਹ ਮਾਣਕ ਲਈ ਵੀ ਉਸੇ ਤਰ੍ਹਾਂ ਅਰਦਾਸ ਕਰਨ ਜਿਵੇਂ ਉਨ੍ਹਾਂ ਦੇ ਇਕਲੌਤੇ ਪੁੱਤਰ ਅਤੇ ਪੰਜਾਬੀ ਗਾਇਕ ਯੁੱਧਵੀਰ ਮਾਣਕ ਦੀ ਅਰਦਾਸਾਂ ਕਰ-ਕਰ ਕੇ ਜਾਨ ਬਚਾਈ ਹੈ। ਸ੍ਰੀ ਮਾਣਕ ਦੀ ਪਤਨੀ ਨੇ ਦੱਸਿਆ ਕਿ ਉਨ੍ਹਾਂ ਦੇ ਇਲਾਜ ਲਈ ਦੇਸ਼-ਵਿਦੇਸ਼ ਵਿਚ ਬੈਠੇ ਸੁਭ ਚਿੰਤਕ ਬਹੁਤ ਫਿਕਰਮੰਦ ਹਨ, ਪਰ ਉਨ੍ਹਾਂ ਨੇ ਕਿਸੇ ਵਿਅਕਤੀ ਤੋਂ ਸ੍ਰੀ ਮਾਣਕ ਦੇ ਇਲਾਜ ਲਈ ਕਿਸੇ ਵਿਅਕਤੀ ਨੂੰ ਉਗਰਾਹੀ ਕਰਨ ਦੀ ਇਜ਼ਾਜਤ ਨਹੀਂ ਦਿੱਤੀ। ਜੇਕਰ ਕੋਈ ਵਿਅਕਤੀ ਜਾਂ ਸੰਸਥਾ ਉਨ੍ਹਾਂ ਦੇ ਪਤੀ ਦੇ ਸਤਿਕਾਰ ਵਿਚ ਕੋਈ ਆਰਥਿਕ ਸਹਾਇਤਾ ਭੇਜਣਾ ਚਾਹੁੰਦਾ ਹੈ ਤਾਂ ਉਹ ਉਨ੍ਹਾਂ ਦੇ ਬੈਂਕ ਖਾਤੇ ਵਿਚ ਪੈਸੇ ਜਮਾਂ ਕਰਵਾ ਸਕਦਾ ਹੈ। ਇਹ ਖਾਤਾ ਸਾਡੇ ਦੋਹਾਂ ਜੀਆਂ ਦੇ ਨਾਮ ਤੇ ਹੀ ਸ਼ੁਭ ਚਿੰਤਕਾਂ ਵਲੋਂ ਖੋਲਿਆ ਗਿਆ ਹੈ। ਉਨ੍ਹਾਂ ਆਖਿਆ ਕਿ ਸਾਡੇ ਪਰਿਵਾਰ ਨੂੰ ਇਸ ਵੇਲੇ ਕਿਸੇ ਕਿਸਮ ਦੇ ਤਰਸ ਦੀ ਲੋੜ ਨਹੀਂ ਸਗੋਂ ਪਿਆਰ ਅਤੇ ਸਹਿਯੋਗ ਦੀ ਲੋੜ ਹੈ, ਤਾਂ ਜੋ ਅਸੀਂ ਇਸ ਸੰਕਟ 'ਚ ਨਿਕਲ ਸਕੀਏ।

ਪੰਜਾਬੀ ਸਾਹਿਤ ਅਕਾਡਮੀ ਲੁਧਿਆਣਾ ਦੇ ਅਹੁਦੇਦਾਰਾਂ ਨੇ ਹਸਪਤਾਲ ਵਿਚ ਮਾਣਕ ਸਾਹਬ ਨਾਲ ਮੁਲਾਕਾਤ ਕਰਨ ਤੋਂ ਬਾਅਦ ਪੰਜਾਬ ਸਰਕਾਰ ਨੂੰ ਅਪੀਲ ਕੀਤੀ ਹੈ ਕਿ ਉਹ ਕਲਾ, ਸਾਹਿਤ ਅਤੇ ਰੰਗ ਮੰਚ ਦੇ ਪ੍ਰਮੁੱਖ ਸਿਤਾਰਿਆਂ ਦੀ ਸਿਹਤ ਸੰਭਾਲ ਲਈ ਕੋਈ ਅਜਿਹਾ ਵਿਸ਼ੇਸ਼ ਫੰਡ ਜਾਂ ਬੀਮਾ ਯੋਜਨਾ ਤਿਆਰ ਕਰਨ ਜਿਸ ਨਾਲ ਕਿਸੇ ਵੀ ਲੇਖਕ, ਕਲਾਕਾਰ ਜਾਂ ਰੰਗ ਕਰਮੀ ਨੂੰ ਇਲਾਜ ਲਈ ਵਾਰ-ਵਾਰ ਆਰਥਿਕ ਸੰਕਟ ਦਾ ਸਾਹਮਣਾ ਨਾ ਕਰਨਾ ਪਵੇ। ਇਸ ਬਾਰੇ ਅਹੁਦੇਦਾਰਾਂ ਨੇ ਪੰਜਾਬ ਪਬਲਿਕ ਸਰਵਿਸ ਕਮਿਸ਼ਨ ਦੇ ਨਵ-ਨਿਯੁਕਤ ਚੇਅਰਮੈਨ ਹਰੀਸ਼ ਰਾਏ ਢਾਂਡਾ ਨਾਲ ਵੀ ਗੱਲਬਾਤ ਕੀਤੀ ਹੈ ਤਾਂ ਜੋ ਉਹ ਉਪਰੋਕਤ ਅਪੀਲ ਪੰਜਾਬ ਸਰਕਾਰ ਤੀਕ ਪਹੁੰਚਾ ਸਕਣ।

Read More

1:44 PM | 0 comments